Naghinaot si Atty. Jojo Lacanilao, convenor sa Duterte Panagutin Campaign Network Movement, nga mabawi pa sa bag‑ong mayorya sa Senado ang pagsalig sa katawhan human kini mihagba og dako sa pagkakaron.
Matod pa niya, lisod ihatag ang kompiyansa sa maong institusyon tungod sa gihimong pagpanalipod ug pagpatago kang Senador Ronald “Bato” Dela Rosa nga giila na sa ICC isip kriminal, pinaagi sa protective custody nga wala man unta nalatid sa balaod.
Gawas sa pagpanalipod, giingon pa niya nga gipatakas pa kini, hinungdan nga dako kaayo ang kadaot sa imahe sa Senado.
Tungod niini, kinahanglan matan‑aw sa publiko kung mapatuman ba gihapon ang demokrasya ug mapanalipdan ba ang konstitusyon sa mga sunod nga aksyon sa mga magbabalaod.
Sa kasamtangan, ubos kaayo ang trust rating sa mayorya sa Senado nga karon ubos sa liderato ni Senate President Alan Peter Cayetano.
Busa, naglaum si Lacanilao nga marekober pa sa institusyon ang pagsalig sa katawhan.
