Gi-kumpirmar ni Senador Erwin Tulfo nga nakadawat na sa abiso ang majority bloc sa Senado bahin sa ipatawag nga special session ni Presidente Ferdinand Marcos Jr. karong Miyerkules, Hunyo 17.
Ubos sa pagdumala ni Acting Senate President Sherwin Gatchalian, andam na ang mga senador nga hisgutan ug aprobahan ang mga nalangang balaodnon, ilabi na kadtong anaa na sa ikatulo ug pinal nga pagbasa.
Apil sad sa agenda ang pagpundok sa Commission on Appointments (CA) aron aksyonan ang mga pending appointments, lakip na ang promosyon sa tulo ka heneral ug ang naturalization sa duha ka magdudula sa basketball nga gustong magpapili isip lungsuranon sa Pilipinas.
Gilauman nga molungtad lang sa usa ka adlaw ang maong sesyon, diin sugdan kini sa buntag para sa mga balaodnon ug sundan sa hapon para sa tigom sa CA.
