CAGAYAN DE ORO CITY – Gikasubo sa kapolisan nga napusilan-patay nila ang usa sa tulo ka gitoohang tulisan nga nakig-pinusilay kanila dihang natigayon ang ginukdanay sa national highway sa lungsod sa Pangantucan,Bukidnon.
Kini human unang mihimo’g pagpanulis ang maong mga armadong suspek sa GT Fuels gasoline station sa Brgy Adtuyon diin nadala ang 5-mil pesos cash ug personal belongings sa kahera sa pagpanibat niini.
Saysay ni Bukidnon Police Provincial Police Office Director Col. Jovit Culaway nga igo pagsibat sa mga tulisan,paspas nakatawag ang kahera sa gasolinahan sa kapolisan hinungdang gilayong mihimo sa checkpoint sa posibleng lutsan sa mga tulisan.
Apan nakig-pinusilay ang mga tulisan ngadto sa mga pulis diin nag-resulta sa kamatayon sa 24 anyos nga apil sa maong kremin.
Nakasibat ang duruha kay nakalinggawas sa kinawat usab nila nga pribadong sakyanan diin nahulog sa pangpang sa sobrang kataranta nga maapsan sa mga pulis.
Nasuta nga naggikan sa Pikit, North Cotabato ang mga suspek diin narekober sa sulod sa kinawat nga sakyanan ang granada,kalibre 45 nga armas ug ubang mga ebedensiya.
Sa gihimo usab nga pagpanubay sa kapolisan, nadakpan nila ang usa sa mga nakasibat nga suspek pinasikad sa joint checkpoint diin nasuta nga gikansa Datu Montawal,Maguindanao del Sur.
Kasong pagpanulis,attempted murder,pagsupak sa Comelec gun ban ug illegal possession of firearms ang gipakang sa mga pulis batok sa mga suspek.
