Mopetisyon ang Ukraine sa dugang $20 bilyon nga pundo sa militar gikan sa mga kaalyado niini sa panagtigom sunod semana aron mapalig-on ang ilang bentaha sa panggubatan batok sa Russia.
Kini nga hangyo pagahisgotan karong mosunod nga Huwebes sa tigom sa Ukraine Defense Contact Group, usa ka alyansa sa kapin sa 50 ka nasod nga nailhan usab nga Ramstein group.
Matod pa sa usa ka impormante sa depensa sa Ukraine, dinalian kini nga pundo tungod kay duna lang sila’y unom hangtod siyam ka bulan nga higayon sa panggubatan.
Sa pagkakaron, mihinay ang pag-atake sa Russia human maapektohi ang ilang suplay ug logistika tungod sa mga pagpamomba sa drone sa Ukraine.
Bisan pa niini, gipahayag ni Russian President Vladimir Putin nga sige gihapon ang pag-abante sa iyang mga sundalo matag adlaw ug luwas ang ekonomiya sa ilang nasod. (riza budlao)
