Nagpabilin ang grabeng tensyon sa Middle East human nagbinayloay og mabangis nga airstrikes ang United States ug Iran sulod sa duha ka sunod-sunod nga adlaw.
Gipulbos sa US Central Command ang mga air defense ug radar sites sa Iran, isip dinalian nga tubag sa gihimong pagpabuto og missiles sa maong nasod ngadto sa mga base sa Amerika.
Direktang nagbahad si US President Donald Trump nga dili mohunong ang maong pagpamomba, kon dili mopirma ang Tehran og usa ka kasabutan sa kalinaw ubos sa iyang mga termino.
Gipaluyohan usab kini ni Defense Secretary Pete Hegseth, kinsa namahayag nga andam silang mogamit og pwersa militar aron mapugos ang Iran nga makignegosasyon.
Tungod niining dakong kagubot sa Strait of Hormuz, gilauman na usab ang grabeng pagsaka sa presyo sa lana ug paghapak sa inflation sa tibuok kalibutan. (Jane Abulag)
