CAGAYAN DE ORO CITY – Mihimo na’g aksyon ang Cagayan de Oro City Police Office o COCPO kuyog ang konseho sa brgy ug Departamento sa Edukasyon kabahin sa gidangatan sa minilyong balor sa 42 ka lawak saringan sa Cugman National High School sa Zone 9, Brgy Cugman sa dakbayan.
Kini sa tuyo nga madakpan ang mga midagmal nga mga tawo sa maong proyekto nga dako na unta’g tabang alang sa pag-umol sa kaugmaon sa kabataan sa natad sa edukasyon.
Natawag ang atensyon sa city government kabahin sa unang pagtuki sa Bombo Radyo sa maong tunghaan nga nagsilbi nang suyupanan sa ilegal nga droga ug abutanan sa mga mag-uyab.
Nagsumikad ang mando ni COCPO Director Col Salvador Radam kay dunay mga narekober nga kagamitan sa paggamit sa ilegal nga droga sa pipila ka lawak ug gipangkawat usab ang pasilidad nga mapuslan sulod sa maong tunghaan.
Nasayran nga duha ka tuig nang natibawas ang maong tunghaan nga iya sa kanhi administrasyon ni former City Mayor Oscar Moreno apan wala magamit sa panahon ni City Mayor Rolando ‘Klarex’ Uy kay kulang sa koneksyon sa koryente ug tubig.
Kini ang rason nga ang mga adis-adis ug mga paresan sa mga uyab ang nagpahimulos niini.
Una nang personal gisusi ni Cugman Police Station commander Capt Macario Linog Jr ang maong tunghaan ug mitukma ang mga gibalik sa mainstream ug social media kabahin niini.(Photo by PS 10 Cugman)
