Personal nga gibisita ni Vice President Sara Duterte niadtong Domingo ang mga residente nga naapektuhan sa magnitude 7.8 nga linog nga miigo sa Mindanao aron masayran ang ilang kahimtang ug panginahanglan.
Subay sa report sa Office of the Vice President (OVP), si VP Sara unang mibisita sa Barangay Nuing sa Jose Abad Santos aron personal nga masuta ang mga apektadong pamilya ug masiguro nga mahatod ang gikinahanglan nga tabang sa komunidad.
Gibutyag sa OVP nga naghatag usab ang Bise Presidente sa ayuda sa mga residente nga naapektuhan sa kusog nga paglinog.
Pagkahuman sa pagbisita sa Davao Occidental, mipadulong si Duterte sa Sarangani Municipal Hospital ug sa usa ka evacuation center sa Barangay Mabila sa Balut Island aron susihon ang kahimtang sa mga evacuees ug mga pasyente nga naapektuhan sa sakuna.
Miadto usab ang Ikaduhang Pangulo sa Glan, diin nakigpulong siya sa mga pamilya nga milikas ug temporaryong nagpuyo sa Glan Tent City evacuation site.
Gibisita usab niini ang mga pasyente nga giatiman sa Philippine Emergency Medical Assistance Team Field Hospital.
