Opisyal nang gipasaka sa Department of Justice (DOJ) ang tulo ka counts sa kasong “grave threats” batok kang Bise Presidente Sara Duterte sa Quezon City Regional Trial Court.
Gikumpirma kini ni DOJ Spokesperson Atty. Polo Martinez, kinsa mipadayag usab nga gibasura sa departamento ang laing reklamo sa “inciting to sedition” nga gi-refer sa National Bureau of Investigation (NBI) tungod kay wala makit-i sa panel of prosecutors ang igong prima facie evidence nga adunay reasonable certainty of conviction.
Sa laing bahin, gipadayag sa abogado ni VP Sara nga si Atty. Paul Lawrence Lim nga gipaabot na nila ang maong lakang ug andam ang ilang kampo nga gamiton ang tanang legal nga remedyo, samtang giinsistir niya nga nagpabilin nga “presumed innocent” ang Bise Presidente.
Giingon usab ni Lim nga, isip usa ka naglingkod nga impeachable officer, dili dapat mapasaka ang criminal case nga may kalabotan sa alegasyon nga mao usab ang subject sa impeachment proceedings, diin usa ka legal nga argumento nga gisupak sa DOJ, nga miingon nga mahimong magpadayon ang duha ka proseso nga dungan. (riza budlao)
