CAGAYAN DE ORO CITY – Gihulat na sa kapolisan ang paglugwa sa warrant of arrest batok sa grupo sa mga tulisan nga milusob sa Gold Mega Jewelry diin nadala ang inisyal 9 milyones pesos nga balor sa mga alahas sa J.R Borja Street,Brgy 29 sa syudad.
Kini human kompirmaha ni City Police Director Col. Salvador Radam nga naduso na ang kasong pagpanulis sa piskalya batok sa maong mga tulisan sa miaging semana.
Miingon si Radam nga kanhi dunay mga doket o record na sa pagpanulis ang maong grupo diin lima kanila ang naila na ug nakushan.
Apil sa gikasuhan ang drayber sa Toyoto Wigo nga si Nito Pedros diin nagsilbing get-away vehicle sa mga tulisan ug narekober ang sakyanan sa lungsod na sa Clarin,Misamis Occidental.
Giangkon ni Radam ang kakulangon sa kahugot sa pagbantay hinungdang nalutsan sa mga tulisan ang dakbayan.
Samtang nabulgar atol sa gihimong security briefing sa Oro Chamber of Commerce nga dose hangtod trese ka tuig nang wala mag-function ang city funded nga CCTV cameras nga na-instolar sa pipila ka nag-unang kadalanan sa dakbayan.
Kini aron unta makatabang sa pag-monitor sa mga kalihukan ug dagkong dili maayong panghitabo sama sa pagpanulis sa syudad.
Depensa ni committee on public order chairman Kag. Romeo Calizo nga naglisod ang sunod nga administrasyon sa pag-repair kay supply-based ang nasudlan nga kasabutan ug dili haom sa kagustuhan ug panginahanglan sa katawhan sa dakbayan.
Sentro sa natuki usab sa maong tigom ang dakong tulis nga natigayon sa dakbayan sa milabay’ng semana.
Dugtong usab niiini,gipasalig sa liderato sa konseho nga buksa’g balik ang interes nga magbaton sa bag-ong state of the art CCTV cameras ang dakbayan.
Kini maoy tubag ni Kag. Edgar Cabanlas kabahin sa hangyo sa mga negosyante nga dili lang sila ang bahad-baharan sa city govt nga walay renewal sa business permits kon dili magbaton sa maong teknolohiya ug mga sekyu sa mga negosyo.
Miingon si Cabanlas nga gi-welcome usab nila ang ideya nga magbaton sa CCTV command center ang city hall aron mas matutukan ang kahimtang ug mga kalihukan sa dakbayan.
