CAGAYAN DE ORO CITY – Nagpatulo na lang kutob sa mga luha ang mag-live in partner nga ginikanan sa 2 anyos nga batang lalaki nga kalabera nang nakit-an sa hubas nga sapa sa Sitio Sinait sa Valencia City,Bukidbnon.
Giila ni Bukidnon Provincial Police Office spokesperson Police Major Jiselle Longgakit ang biktima nga si Adrian Mark Alcomenras kinsa na missing sukad Disyembre 11,2022.
Siya miingon nga gilayong gitaho sa ginikanan sa kapolisan ang pagka-missing sa bata apan pakyas kining ma-rekober sa maong higayon.
Apan sa wala damha,may nakabantay sa lokasyon bata nga nabukog na rason nga paspas kining gitaho sa pamilya ug gilayong misaka ang mga otoridad aron pagsuta niini.
Gikompirmar usab sa ginikanan nga mao kadto ang ilang anak nga nawala.
Katingad-an lamang kon kinsa ang nagdala sa bata sa bukirang bahin diin dos-kilometros ang distanya niini gikan sa ilang balay.
Gisugyot nga ipaubos sa otopsiya ang biktima apan nagdumili na ang pamilya niini.
