Gikompirmar ni Kongresista Rufus Rodriguez sa ikaduhang distrito sa Cagayan de Oro nga gi-aprobahan na sa House of Representatives sa ikatulong ug kataposang pagbasa sa balaodnon nga nagtinguha nga lugwayan ang termino sa mga opisyal sa barangay ngadto sa lima ka tuig.
Sa exclusive interview sa BOMBO RADYO, si Rodriguez misulti nga gitumong ang lakang aron dili mag-abot o magka-atbang ang termino sa mga opisyal sa barangay ug sa piliay sa nasyonal nga lebel sa 2028.
Gibutyag sa kongresista nga ang lugway makahatag sa igong panahon sa mga lider sa komunidad aron mapatuman ang ilang mga programa o taposon ang mga nasugdang proyekto aron walay pagkabalda gumikan sa eleksyon.
Gilauman sa magbabalaod nga mapaspasan ang pagtuki niini sa senado aron mapalabang isip balaod.
