Gipagawas sa impeachment trial nga adunay 51 ka armas ang nakarehistro sa ngalan ni Vice President Sara Duterte ug sa bana nga si Manases Carpio, lakip na ang mga automatic rifle.
Base sa listahan sa Philippine National Police, 22 ka pusil ang nakarehistro kay Duterte, samtang 29 ang nakarehistro kay Carpio, diin lakip niini ang 4 ka Class A light weapons nga adunay fully automatic firing capability.
Sumala sa PNP Firearms and Explosives Office, moabot sa kapin 7.2 million pesos ang presyo sa maong mga pusil sa merkado karon.
Apan gipasabot sa kampo sa depensa nga ang maong kantidad nakabase ra sa presyo karon ug dili sa tinuod nga bayad dihang gipalit ang mga pusil.
Gipagawas ang maong mga rekord isip bahin sa kaso bahin sa gipasalig nga dili maipasabot nga propedad batok sa Bise Presidente.
