(Update) CAGAYAN DE ORO CITY-Nangayo’g pasaylo si PFC Guillmo Salinas Lofranco Jr gikan sa 51st IB,Philippine Army ngadto kang city hall employee RTA enforcer Mark Sherwin Relevo nga pulos nagpuyo ning syudad.
Kini human samaron si Relevo dihang naigo sa tipaka sa gipabuto ni Lofranco nga M-4 rifle nunot sa ilang panaglalis sa balaod trapiko sa J.R. Borja Bridge ning syudad kagahapong adlawa.
Miingon si Lofranco nga nasayop kini sa iyang gipakita nga taras kang Relevo hinungdan andam siya mangayo’g pasaylo aron dili siya mawad-an sa trabaho.
Si Lofranco ang gisugo sa iyang army official nga ipaayo ang pribadong sakyanan nga gipanag-iya usab sa usa ka Maranao-Muslim didto sa Marawi City.
Samtang pursigido si Relevo nga kasuhan sa korte si Lofranco.
Kini human dili tiaw’ng kahadlok ang gibati ni Relevo samtang gitiunan ug gipabutha’g armas ni Lofranco hinungdan siya naangol.
Gibutyag ni RTA administrator Engr Nonito Oclarit nga ipasaka nila ang frustrated murder ug ubay-ubay’ng traffic violations batok Lofranco sa piskalya sunod semana.
Hinoon,nakagawas na sa ospital si Relevo ug ipapahulay una nila kini aron mawala ang trauma tungod sa gihimo sa suspek.
Dugtong niini,dismayado ang kadagkuan sa Joint Task Force Ranao dihang nasayran sa Bombo Radyo ang gihimo ni Lofranco kang Relevo.
Miingon si Joint Task Force Ranao Deputy Commander Col Romeo Brawner nga sayop ang gihimo ni Lofranco hinungdan nga angay lamang siya mabilanggo.
Gipasalig ni Brawner nga ipaubos sa imbestigasyon si Lofranco kinsa detinado sa mini-cell sa Maharalika Detention Center.
