CAGAYAN DE ORO CITY-Nagtoo ang City Drugs Enforcement Unit o CDEU sa Cagayan de Oro City Police Office nga gihimong ‘ahente’ sa droga sa mga drug group ang batan-on nga ilang nasikop sa Brgy 37 ning syudad.
Matud ni CDEU head Sr/Insp Maricris Mulat nga nagpasabot lamang kini nga nahurot na ang mga drug pusher hinungdan nga miggamit na sila’g mga ahente.
Una nang gibutyag ni Mulat nga igo lang mianhi sa syudad ang suspek nga si Vindo Salic,18 anyos nga giingong taga- Iligan City aron mag-deliver sa 50 gramos nga shabu diin nagbalor sa 500-mil o tunga sa milyon ka pesos.
Gipanganti ni Mulat nga daghan pang mga bigtime shabu supplier nga naglihok sa syudad ang ilang madakpan.
Kini human pipila sa mga high value target nga anaa sa ilang listahan ang nakumpirmar nga kauban sa grupo ni Vindo Salic.
Si Mulat miingon nga nakita nila sa cellphone sa suspek ang pangalan sa pipila sa ilang target samtang adunay mga pangalan usab nga bag-o nilang nadiskobrehan.
Hisayran nga nabawi sa mga otoridad sa suspek ang buy bust money ug celphone niini.
Samtang gipamugos sa suspetsadong si Vindo Salic nga gikan sa iyang ig-agaw ang dakong kantidad sa shabu nga nakuha kaniya sa mga otoridad.
Gibutyag niini nga igo lamang siya nga gisugo nga mag-deliver sa droga dinhi sa dakbayan.
Hisayran nga nagdumili ang suspek sa pagbutyag sa pangalan sa iyang ig-agaw nga maoy source sa binulto nga shabu.
