PC:Owner
CAGAYAN DE ORO CITY-Gibarugan sa PNP-10 nga lehitimo ang pagsilbi sa CIDG-10 ug militar sa laing warrant of arrests batok kang Communist Party of the Philippines Secretary General Rommel Salinas samtang detinado sa city jail sa Ozamiz City.
Kini human unang namugos ang pipila ka sakop sa media nga nag-imbento lamang ang PNP ug militar aron dunay mapakita nga kalampusan atubangan sa publiko.
Gibutyag ni PNP regional spokepserson Supt Lemuel Gonda nga nagsumikad ang warrant of arrest batok Salinas sa sala ni RTC Branch 32 Presiding Judge Dan Calderon sa kasong frustrated murder ug destructive arson didto sa Caraga Region.
Si Salinas ang unang nagbaton sa halos napulo ka warrant of arrests tungod sa giingong kalambigitan sa kasong mga pagpatay sa rehiyon sa Caraga hinungdan nga may unang mga warrant of arrest nga gipagawas ang korte.
Dumduman nga si Salinas nasikop sa AFP ug PNP dihang naharang sa checkpoint sa Brgy Gango,Ozamiz City niadtong Mayo 11,2017.
Samtang gikompirmar sa 4th ID,Philippine Army nga dakong opisyal sa CPP-Caraga Region si Salinas.
Kini human unang nasikop si Salinas sa grupo ni Ozamiz City PNP head C/Insp Jovie Espenido si Salinas samtang nakisakay kaniadto sa sakyanan usa ka pari sa maong lugar sa miaging tuig 2017.
Miingon si 4th ID spokesperson 1Lt Teresita Ingente nga markado na ang pangalan ni Salinas sa ilang intelligence community hinungdan nga wala na nila gikakurat ang pagkasikop niini.
Si Salinas ang gisilbihan sa PNP ug AFP officials sa duha ka warrant of arrests sa laing mga kaso igo paghuma’g tambong niini sa hearing sa korte sa Ozamiz City sa miaging adlaw’ng Huwebes.
Samtang giakusahan sa mga progresibong pundok ang PNP ug AFP nga misugod na’g lusad sa communist crackdown subay sa mando ni Pres Rodrigo Duterte.
Kini bisan nga mihimakak niini si GRP peace panel chairman Sec Silvestre Bello III.
Namahayag si Bayan Northern Mindanao Sec Gen Wildon Barros nga tataw ang maong kamanduan tungod sa sunod-sunod nga pagsikop sa NDF peace consultants sa kauluhan,Caraga ug Northern Mindanao regions sulod lamang ning semanaha.
Una nang nanganti si Duterte nga bisan ang legal fronts sa CPP-NPA ang ipadakop niini kon makit-ang may basehan ang ilang kalihukan sa insurhensiya.
