PC:Owner
CAGAYAN DE ORO CITY-Nahimoot nga nasayran ni kanhi City Mayor Vicente Emano sa Bombo Radyo nga giingong nagkagubot ang mga tag-as nga opisyal sa PDP-Laban atol sa ilang tigom sa Davao City.
Kini human gilalisan sa partido kon nganong mihimo’g mass oathtaking sa mga bag-ong miembro dinhi sa syudad nga walay pagtugot sa ilang kadagkuan.
Miingon si Emano nga posibleng wala gayu’y kasayuran si Pres Rodrigo Duterte sa mga gihimo sa ilang mga kauban hinungdan nga gi-kuwestiyon ang mga pagpanumpa sa bag-ong mga miembro.
Una niini,mismo si PDP-Laban national council chairman Atty Rogelio Garcia ang nagbutyag sa Bombo Radyo nga dili miembro apan alyansang politikal lamang nila ang mga mihimo’g mass oathtaking sa nagkadaiyang bahin sa nasud.
Samtang giakusahan ni PDP Laban Cagayan de Oro council head Gusa Brgy Kap Marlo Tabac si Emano nga kabahin sa mihimo’g sabotahe sa mass oathtaking sa bag-ong mga miembro sa ilang partido sa USTP ning syudad miaging semana.
Kini ang pagtoo ni Tabac dihang gibutyag usab ni Garcia nga illegal ang pagpahurar ni Senate President Koko Pimentel sa grupo nila ni City Mayor Oscar Moreno sa maong adlaw.
Miingon si Tabac nga miagi sila pag-seminar aron mahimong lehitimong miembro sa partido sukwahi sa pahayag ni Garcia.
