CAGAYAN DE ORO CITY-Makauli na balik sa ilang mga pinuy-anan ang siyam ka miembro sa duha ka pamilya nga tulo ka adlaw nga naglutaw-lutaw sa kadagatang sakop sa Visayas-Mindanao regions.
Kini human unang naluwas sa mga mangingisda ang tulo sa mga biktima dihang miabot sa kadagatang sakop sa Camiguin sa miaging adlaw.
Miingon si Philippine Coast Guard o PCG Northern Mindanao spokesperson Ensign Denise Simeon nga gikan sa Leyte province ang pamilyang Barani ug Melcarani ug padulong sa Surigao del Norte dihang naguba ang gisakyan nilang bangka nga de motor
.Kini ang hinungdan nga nagkabulag ang mga biktima kay natunga ang bangka tungod sa dagkong balod ug kusog nga hangin.
Gilayong mihimo’g search and rescue operation ang PCG-10 diin narekober nila ang laing unom sa mga biktima ug gidala sa mismong headquarters niini dinhi sa syudad kagahapong adlawa.
