CAGAYAN DE ORO CITY-Dili na makabalik sa iyang trabaho ang liason officer sa buhatan ni City Mayor Oscar Moreno nga nasapon paggamit sa gitoohang shabu sulod sa pinuy-anan diha sa Brgy 15 sa syudad.
Panganti kini ni City administrator Teddy Sabugaa tungod sa pagkasikop ni Janus Mark Leyson,33 anyos,ulitawo kuyog dismissed police officer nga si Ricardo Gallardo Jr nga aktong nagsuyop sa gitoohang shabu.
Miingon si Sabugaa nga daan na niya gibaharan ang mga empleyado sa city hall subay sa mando ni Moreno apan wala manumbaling ang pipila niini hinungdan nasikop si Leyson sa miaging gabii.
Samtang tiwason sa kapolisan ang pagsang-at sa kasong paggamit sa gidiling droga batok sa empleyado sa city hall ingon man sa kanhi police officer nga nadakpan sa Regional Drug Enforcement Unit o RDEU ug Divisoria Police Station ning syudad.
Kini human gikulang sa oras ang pagduso sa kaso batok kang Leyson ug Gallardo sa piskalya kagahapon sa hapon.
Gibutyag ni Divisoria Police Station commander C/Insp Julius Clark Macariola nga napa-receive na nila ang case folder sa mga suspek sa gikalambigitan niining kaso.
Samtang gitawag nga binuang sa drug user suspek nga si Janus Mark Leyson nga dakong binuang pagdakop kanila sa kapolisan sulod sa pinuy-anan diin sila akto naggamit sa gitoohang shabu sa Brgy 15 ning syudad.
Kini human namugos si Leyson nga wala sila mapaliti sa shabu dihang milusob ang kapolisan hinungdan sila nadakpan.
Miingon si Leyson nga gihulatan na lamang niini ang resulta sa drug test aron matumbok nga naggamit o wala kini sa shabu.
Si Leyson ang dugay nang nadungog nga tiggamitan sa gidiling droga bisan wala pa kini makasulod sa trabaho sa city hall.
