CAGAYAN DE ORO CITY-Kasuha’g kriminal sa kapolisan ang kanhi brgy kapitan nga nakaligis-patay sa trabahante sa pribadong ospital sa Purok 7,Upper Puerto sa syudad.
Giila ni C/Insp Evan Vinias,hepe sa Puerto Police Station ang biktima nga si Reynaldo Indoy,minyo ug nagpuyo sa lungsod sa Manolo Fortich.
Pauli na ang biktima dihang nabanggaan sa gisakyang pick-up sa kanhi brgy kapitan nga si Robin Anyon nga taga-lungsod usab sa Kadingilan,Bukidnon.
Nakaangkon sa dakong damyos ang ulo sa biktima hinungdan nga gilayon nakabsan sa kinabuhi kagahapon sa hapon.
Samtang atubangon sa driver-suspect ang gipasaka sa kapolisan nunot sa kamatayon sa motorista nga nabanggaan niini sa Purok 7,Upper Puerto sa syudad.
Giangkon ni Anyon nga kusog ang dagan sa iyang sakyanan padulong dinhi sa syudad tungod sa pagbundak sa ulan.
Miingon si Anyon nga dili niya talikdan ang iyang obligasyon sa pagkamatay ni Indoy.
Nangayo na lamang kini’g pasaylo sa pamilya ni Indoy tungod sa maong aksidente.
