CAGAYAN DE ORO CITY – Giimbestigartan na sa Hongkong govt ang kompanyang utok sa pagpalusot sa electronic waste nga gipalusot sulod sa Mindanao Container Terminal o MCT sa lungsod Tagoloan,Misamis Oriental.
Kini human mismo ang gobierno sa Hongkong ang nangunay pagpakuha’g balik sa container van nga puno sa electronic waste nga unang nag-abot sa Pilipinas niadtong Enero ning tuiga.
Miingon si MCT collector John Simon sa Bureau of Customs nga maoy gipaubos sa imbestigasyon ang Hin Yuen Tech. Env. Limited nga naka-consign sa Crowd Win Industrial Limited Corporation ug gi-broker sa usa ka Yolanda Mondragon Narandan.
Namahayag si Simon nga angay lamang manubag ang mga tawo nga nalambigit sa maong kontrabando tungod sa sobra ka dako sa peligro nga dala niini sa panglawas sa tawo ug kinaiyahan.
Gikuha na ang basura diin gisakay sa barko sa SITC Nagoya mismo sa yarda sa MCT ning lalawigan.
