CAGAYAN DE ORO CITY – Sapon sa akto ang mukabat sa 495 ka tawong nagtapok sulod sa worship house nga gi-organizar sa “The Word of God Spirit and Life Ministries Incorporated” nga nahimutang sa Rizal Theater, Capistrano- Montalban Sts., ning syudad, kaganina sa buntag.
Sa interbyu sa Bombo Radyo Cagayan de Oro kang Regulatory and Compliance Board (RCB) Inspectorate Antonio Resma, iyang gibutyag nga usa na ka semana nga gi-bantayan sa mga elemento sa Police Station 1 ang maong grupo ug nabadlong na sa Barangay LGU ang mga organizers niini subay sa kamanduan sa Bayanihan To Heal as One Act kon 11469, nga gidili ang mga mass gathering samtang nag-atubang ang nasud sa krisis sa COVID-19 pandemic.
Miingon si Resma nga nagmagahi ang mga organizer sa maong grupo ug dili muminos sa 400 ka tawo ang ilang nasapon nga mihimo’g pag-ampo atol sa ilang actual nga pag-inspection, base sa nakalatid sa attendance sheet sa grupo.
Gumikan niini, ipasaka ang kasong paglapas sa Article 151 ug Section 9 sa Repbulic Act 11332 o mas nailang “Mandatory Reporting of Notifiable Diseases and Health Events of Public Concern Act” batok sa mga organizers.
Gi-awhag ni Resma ang publiko nga mutabang sa mga otoridad sa pag-report sa mga social gatherings nga makalapas usab sa RA 11469.
Samtang, base sa facebook video sa RCB, gipamugos sa wala magpailang pastor nga dili sila ang angayang dakpon sa mga otoridad, apan kadtong mga “nag masakiton”.
