CAGAYAN DE ORO CITY – Detinado na sa Misamis Oriental Provincial Jail ang pito ka gitoohang miembro sa rebeldeng New Peoples Army o NPA nga nadakpan sa Criminal Investigation and Detection Group CIDG -Misamis Oriental ug AFP diha sa Balingasag, Misamis Oriental.
Si CIDG-Misamis Oriental deputy team leader Lt. Noel Oclarit miingon nga maoy ilang gikasuhan sa RA 10951 o illegal possession of firearms and ammunition ang mga suspek nga sila si Pilutong Langka, Pablita Hilogon, Reynaldo Ayuma, Dandi Hilogon, Bambi Hilogon, Padod Ayuma ug Glenn Hilogon.
Samtang kasong pagsupak usab sa Republic Act 9516 for illegal possession of explosives ang gipasaka batok sa at-large nga sila si Junrey Boy Hilogon ug Berni Gandino.
Hisayran nga nadakpan ang mga suspek gumikan sa search warrant nga gisilbi sa mga otoridad diin narekober sa ilang posisyon ang mga tag-as nga kalibre sa armas, bala ug mga explosive device.
