CAGAYAN DE ORO CITY – Gibutyag karon ni Presidente Rodrigo Duterte nga makalinggawas na ang katawhang Pilipinhon batok sa coronavirus disease pandemic sa umaabot Disyembre ning tuiga.
Kini human gigarantiya sa China kang Duterte nga naghulat na lamang sa pagtugot gikan sa ilang Food and Drug Administration sa vaccine distribution ang mga bakuna nga anaa sa phase 3 aron magamit nga pakigbatukan ang bayrus.
Miingon si Duterte nga gamay’ng antos na lamang alang sa katawhang Pilipinhon batok bayrus kay una nga hatagan sa prioridad sa China ang Pilipinas sa maong mga bakuna.
Gani,gitandi sa presidente ang ubang mga bakuna gikan sa laing kanasuran diin mas abante daw ang nahuman sa Tsina hinungdan mapadali ang pag-release niini alang sa Pilipinas.
Giklaro ni Duterte nga bayran sa gobierno ang maong mga bakuna nga makua gikan sa China ug ang Department of Health na ang mopili kon unsa nga klase sa anti-COVID-19 vaccines ang angay gamiton sa mga positibong pasyente dinhi sa nasud.
Una nang anaa sa phase 3 ang lima ka international pharmaceutical companies diin tulo niini gikan sa China samtang tag-usa gikan sa Gran Britanya ug Amerika.
Gihimo ni Duterte ang pahayag nunot sa iyang pagpatawag sa naglangkob sa inter-agency task force sa Malakanyang karong buntag lamang.
Hisayrang ang Pilipinas nagbaton na sa sobra 89-mil ka kaso diin nalabwan pa niini ang China nga tinubdan sa bayrus nga anaa lamang sa 84 – mil 165 sukad Disyembre 2019.
