CAGAYAN DE ORO CITY – Gidepensa ni Balingasag Mayor Alexis Quina kon nganong gidawat niini ang tanyag ni City Mayor Oscar Moreno nga ipadala sa city isolation facilities ang ilang mga positibong pasyente dinhi sa syudad.
Miingon si Quina nga mas prioridad niya nga mahatagan sa ensakto nga pag-atiman ang mga residente niini kaysa mag-antos sa kakulangon sa ilang lungsod.
Giila usab sa mayor ang dakong tabang nga natunol ni Gov Bambi Emano ngadto sa iyang lungsod sukad nasudlan sa bayrus.
Samtang gitahasan ni Quina ang iyang mga pulis nga sutaon kon kinsa ang sundalo nga nagdala sa kaugalingong kapikas niini gikan sa kauluhan nga giingong sinugdanan nga nasudlan sa local transmission sa coronavirus ang ilang lungsod.
Kini human na-establisar ang pagkatakdi sa pipila ka residente sa maong sakit nga pulos walay travel history gikan sa ubang lugar.
Miingon si Quina nga dili niya palabyon ang pagkaso kon matumbok na sa kapolisan ilabina kon tinood nga ang gisuta pa nga magtiayon ang tinubdan sa bayrus sa ilang lungsod.
