CAGAYAN DE ORO CITY – Naka-lockdown tungod sa laing local transmission sa coronavirus disease diha sa porsyon sa Purok 5,Zone 10,Upper Carmen sa syudad.
Kini tungod sa kamatayon sa 75 anyos nga babaye nga nagsilbing ika-192 nga positibong pasyente sa bayrus nga nagsumikad sa maong lugar.
Miingon si city epidimiologist Dr Joselito Retuya nga nahuptan usab nila ang 13 ka close contacts sa pasyente nga naglakip sa medical worker gikan sa J.R Borja City Memorial Hospital ning syudad.
Tungod niini,may walo ka pasyente na ang namatay gikan sa 192 ka kaso samtang 66 ang aktibong kaso ug 118 ang naka-rekober kontra COVID-19.
Samtang mibati’g ka-alarma si City Mayor Oscar Moreno sa local transmission sa coronavirus disease sa Purok 5,Zone 10,Upper Carmen sa syudad.
Kini ang rason nga gimando ni Moreno sa puwersa sa city hall nga masilyuhan ang entrance ug exit areas aron limitado ang lihok sa 360 ka pamilya sa maong lugar.
Miingon ang mayor nga tuyo niini nga dili na mapun-an ang matakdan sama sa namatay nga 75 anyos nga babaye dihang natakbuyan sa bayrus.
Sukad nasudlan sa bayrus ang Northern Mindanao,ang maong bahin sa syudad ang dunay labing daghan nga kaso sa local transmission ning tuiga.
