CAGAYAN DE ORO CITY – Mi-depensa ang Northern Mindanao Medical Center o NMMC sa ulahi nga findings nga positibo sa coronavirus disease ang namata’y’ng pasyente samtang gitabang sa pag-atake sa kasingsing sa miaging adlaw.
Kini human gikadismaya sa mga kabanay kon nganong wala gilayon nasultihi sa mga doktor nga positibo ang resulta sa swab test sa maong pasyente nga gikan sa Butuan City apan dinhi gipatambalan.
Miingon si NMMC liason officer Dr Bernard Rocha nga daan nang COVID-19 suspect ang pasyente ug gi-rekomendar usab nila nga ipaubos sa cremation.
Apan nakurat na lamang sila kay wala sunda ang kamanduan ug gihaya na hinoon sa pribadong punerarya sa Brgy Iponan ning syudad.
Samtang bisan si City Mayor Oscar Moreno ang walay nakit-an nga kakulangon o kasaypanan nga nahimo ang NMMC sa pag-atiman sa pasyente nga namatay tungod sa coronavirus disease.
Miingon si Moreno nga subay sa iyang impormasyon nga nakuha,gipatuman sa NMMC ang COVID-19 protocols sukwahi sa giingong pagpasagad niini.
Gibutyag sa mayor nga maoy dakong trabaho sa nahitabo ang pag-contact trace sa medical workers nga nag-atiman ug ang mga tawo nga nagdala sa pasyente gikan sa Butuan City nga mihapit sa Medina,Misamis Oriental ayha nakaabot sa NMMC.
