CAGAYAN DE ORO CITY – Gihupay ni City Mayor Oscar Moreno ang kabalaka sa katawhan nga hayan natakdan kini sa coronavirus disease ning syudad.
Kini human positibo sa bayrus si City Councilor Jay Pascual kinsa iyang kabanay ug kanunay gikakuyog-kuyog sa miaging mga adlaw.
Giklaro sa mayor nga sulod sa na 11 ka adlaw,wala siya’y bisan unsa nga gibati sa panglawas sukad ulahi sila nagkakuyog ni Pascual niadtong Agosto 28 ning tuiga.
Nanghinaut si Moreno nga paspas ang pagkaulian sa konsehal kinsa ubos sa pag-atiman sa temporary treatment and monitoring facility ning syudad.
Samtang nagtoo si Pascual nga natakdan siya sa COVID-19 pinaagi sa local transmission dinhi sa syudad.
Kini human angkona ni Pascual nga sunod-sunod ang iyang pagpakigkita sa frontliners diin siya naghatag sa mga ayuda ngadto kanila.
Gibutyag sa konsehal nga anaa ra siya sa maayo nga kahimtang ug subli gipasalig ang pagtabang sa tanang frontliners ilabina sa mga pulis nga kabahin sa naghatag seguridad aron maubsan ang ihap sa mga positibo sa bayrus sa dakbayan.
Dugtong niini,limitahan sa city council ang mga kalihukan tungod sa labing unang kaso sa coronavirus nga mitakboy sa ilang kauban nga konsehal ning syudad.
Gibutyag ni City Vice Mayor Rainer Kikang Uy nga hinoon anaa ra sa luwas ang mga empleyado sa konseho kay wala sila makahimo’g pisikal ng regular session nga kuyog si Pascual sa miaging Agosto ning tuiga.
Miingon ang bise-mayor nga mohimo usab sila sa dugang pagpahugot sa health security sa konseho aron dili masundan ang positibong kaso nga nahitabo kang Pascual.
