CAGAYAN DE ORO CITY – Gilaraw sa Dept of Health 10 ang subli pagpadala sa swab specimen sa mga positibong kaso sa COVID-19 sa Iligan City sa Research Institute of Tropical Medicine,Southern Philippines Medical Center ug Cebu City.
Kini ang nakit-ang opsyon ni DoH 10 Director Adriano Suba-an aron paspas molugwa ang resulta sa mga gipaubos sa swab test.
Miingon si Suba-an nga gihimo nila kini tungod sa daghang specimen nga naka-pending ilabina nga paspas nga natala ang local transmission sa bayrus sa Iligan City.
Naka-house modified enhanced community quarantine ang Iligan City diin kabahin sa nagpositibo sa bayrus ang ilang bise-mayor ug usa ka city councilor sukad pa sa miaging Agosto ning tuiga.
Samtang target kab-uton sa Iligan City IATF nga ma-flatten ang curve sa taas nga kaso sa coronavirus sa halos tanang brgy sa Iligan City.
Kini human gidid-an una ang pagpasulod sa locally stranded individuals ug returning OFWs samtang taas pa ang local transmission sa maong dakbayan.
Gibutyag ni Iligan City -LGU information officer Joe Pantoja nga sa sobra 400 nila ka positibong kaso sa bayrus,tinguha nila makab-ot ang pagpugong niini nga mapun-an sugod ning semanaha.
Una nang mitabang ang CdeO-LGU pinaagi sa pag-house sa LSIs ug returning OFWs sa pipila ka hotels sa syudad imbis ipapauli sa Iligan.
