CAGAYAN DE ORO CITY – Napun-an ang ihap sa mga pasyente nga namatay samtang naghambin sa coronavirus disease ning syudad.Kini human nabugtuan sa kinabuhi ang case 356 ning syudad.
Gibutyag ni City Health Office head Dra Lorraine Nery nga mitala na sa 18 ang ihap sa mga tawo nga nakalas tungod sa local transmission sa bayrus sa syudad.
Miingon si Nery nga kabahin ang maong pasyente sa 23 ka bag-ong infection nga napulo sa listahan sa mga positibo diin moabot na sa 541 diin 189 ang pabiling aktibong kaso.
Napun-an usab sa 14 ka pasyente ang nangaulian na sa bayrus sukad sila nasulod sa nagkadaiyang pasilidad dakbayan.
Samtang gilayong nalubong na ang 33 anyos nga lalaki nga ika-18 nga namatay tungod sa bayrus diha sa Bolonsiri Cemetery,Brgy Camaman-an ning syudad.
Kini isip pagsubay sa health protocols nga dili angay madugay ang exposure sa tawo nga namatay tungod sa coronavirus.
Miingon si City Health Office epidemiologist Dr Joselito Retuya nga namatay ang maong pasyente dihang kalit giatake sulod sa treatment facility ubos sa dakbayan.
Gibutyag ni Retuya nga ang maong pasyente ang direct contact sa unang nagpositibo nga residente gikan sa diha sa Brgy Macabalan ning syudad.
Dugtong niini,modugang sa mga doktor ang syudad nga ipahumtang sa city isolation unit ug temporary treatment management facility o CIU-TTMF sa panahon sa pandemya.
Kini ang hukom ni City Mayor Oscar Moreno nunot sa kamatayon sa laing pasyente nga ubos sa ilang pag-atiman nga positibo sa coronavirus.
Miingon si Moreno nga kini na ang ikatulo nga hitabo nga may pasyente nga namatay sulod sa pasilidad sa dakbayan rason nga angay pun-an ang mga doktor nga gilayong makaatiman kanila.
