CAGAYAN DE ORO CITY – Gikadismaya ug gikasuko ni City Mayor Oscar Moreno social media post sa usa ka paryente sa suspected COVID-19 patient nga daw gihimo lamang sa mga doktor nga panguwarta ang pag-atiman sa tawo nga naghambin niini.
Kini human unang migawas ang pasangil nga gipugos pagbutang sa findings nga COVID-19 ang sakit sa pasyente aron maka-kobra sa dakong bayad gikan sa Philhealth.
Miingon si Moreno nga sobra-sobra na gani ang sakripisyo sa mga doktor pagsalbar sa kinabuhi sa mga pasyente apan may tuyo pa nga gub-on ang ilang kaikag sa serbisyo.
Samtang gihimakak sa pipila ka mga doktor ang alegasyon nga may madawat sila nga dakong salapi kon ma-charge ang usa ka pasyente nga suspected COVID-19 sa rehiyon.
Giangkon ni Dr. Bernard Rocha, Liason Officer sa Northern Mindanao Medical Center o NMMC nga may madawat sila nga salapiapan sukwahi sa alegasyon nga moabot sa 160-mil matag COVID-19 positive patient.
Gipasabot ni Rocha nga anaa lamang sa 10 hangtud 15 porsyente ang ilang madawat isip professional fee ug ang kinatibuk-an mopadulong sa ospital isip bayad sa mga medisinang nagamit sa pasyente.
