CAGAYAN DE ORO CITY – Napun-an pa sa 42 ka bag-ong kaso sa COVID-19 ang data sa City Health Office o CHO ning syudad.
Gibutyag ni CHO head Dra Lorraine Nery nga sa katibuk-ang 951 ka kaso,may 302 kanila ang kasamtangang gipaubos sa medikasyon tungod sa bayrus.
Miingon si Nery nga napun-an usab sa laing duha ka pasyente ang namatay diin naghatod na sa 45 nga death toll sa dakbayan.Gawas niini,may 604 na ka total recoveries ang syudad.
Una niini,gihuptan gihapon sa syudad sa tibuok rehiyon ang taas nga infection sa bayrus,gisundan sa Iligan City ug Misamis Oriental.
Samtang gikompirmar sa City Health Office nga 28 ka piniriso o persons deprived of liberty o PDLs ang natakdan sa COVID-19 samtang ubos sa BJMP- holding area diha sa Brgy Lumbia ning syudad.
Gibutyag ni CHO epidemiologist Dr. Joey Retuya nga ang maong PDLs ang ikatulo nga batch nga gisaka sa kapolisan sa city jail apan nangatakdan sa bayrus samtang gipahimutang sa holding area.
Giangkon ni Retuya nga posibleng natakdan ang mga biktima mismo ra usab sa ilang mga kauban nga mga piniriso.
Temporaryo una nga gisulod sa 3-storey temporary treatment and monitoring facility sa BJMP ang mga nag-positibong mga piniriso.
