CAGAYAN DE ORO CITY – Mihangyo ang pundok sa mga negosyante kang City Mayor Oscar Moreno nga mabalhin ang oras sa pagpatuman sa curfew hours sa mga balay-patigayon sa syudad.
Kini human midangat sa ilang hangyo ang mga negosyante sa economic cluster sa Regional Inter-Agency Task Force nga lu-agan ang alas 9 sa gabii hangtod alas 5:00 sa buntag nga paghipos sa publiko aron kalikayan ang dugang transmission sa COVID-19.
Miingon si NEDA 10 asst regional director Leonila Cajarate nga may hangyo usab ang mga negosyante nga giaprobahan sa RIATF nga tugtan na ang nag-edad 21 anyos ug 60 anyos pataas nga makasulod sa nagkadaiyang establisemiento aron hinay-hinay makabangon ang hagba nga ekonomiya sa rehiyon.
Samtang supak si City Mayor Oscar Moreno nga tugtan ang pagpanggawas sa mga residente nga nag-edad 21 anyos paubos ug kadtong senior citizens sa dakbayan.
Kini bisan sa hangyo sa economic cluster sa RIATF aron makasugakod ang mga negosyante sa epekto sa COVID-19 diin may 53 ka negosyo na ang permanently closed ug 236 ang nagkibhang sa ilang mga negosyante.
Miingon si Moreno nga tungod sa pagsaka sa local transmission,lisod pa kini nga mapatuman ilabina nga nagsobra na sa libo ang kaso sa bayrus sa dakbayan.
