CAGAYAN DE ORO CITY – Kasuhan sa pagsupak sa R.A-10591 ug R.A-9165 ang atubangon sa usa ka kawani sa city hall ug iyang kauban nga nadakpan sa kapolisan tungod sa paghupot sa illegal nga armas ug ginadiling droga.
Naila ang suspek nga si Dhiel Galve, 42 anyos, minyo, electrical inspector sa Office of the Building Official ug residente sa Brgy. Dumarait, Balingasag, Misamis Oriental.
Nadakpan usab ang iyang kauban nga si Juavie Bauda, 45 anyos, minyo nga taga Brgy. Consolacion ning syudad.
Sila nasikop pinaagi sa ‘buy bust operation’ sa mga operatiba sa Regional Special Operations Unit o RSOU-10 diha sa Yacapin St., Brgy. 29 kagabii.
Nakuha gikan sa posisyon ni Galve ang usa ka 38 kalibreng armas ug 50 ka gramos sa gitoohang shabu nga nagbalor sa 340-mil pesos.
Apil sa na-recover sa kapolisan ang 1,500 pesos nga buy bust money.
