(Update) CAGAYAN DE ORO CITY – Nagkasinabot na ang mga pamilya sa duha ka tawo nga nakoryentehan-patay sa kalit pagkatumba sa primary line sa poste sa Cagayan Electric Power & Light Company Incorporated (CEPALCO) sa Purok 6,Upper Puerto ning syudad.
Kini ang gikompirmar ni Police Cpl Rodulfo Abaday,traffic investigator sa Traffic Unit Division sa COCPO kinsa maoy natahasan nga mohimo’g dugang pakusisu sa hitabo.
Giila ni Abaday ang mga namatay nga pulos taga-Barangay Puerto nga sila Roy Villanueva,driver sa tricab ug pasashero nga si Earl Kim Llagas,26 anyos ug ulitawo.
Si Abaday miingon nga hinay ang dagan sa bao-bao kay pasaka kini sa Manolo Fortich,Bukidnon apan kalit natumba ang mga poste sa CEPALCO tungod sa kusog usab nga pag-ulan.
Kini ang hinungdan nga nadapat ngadto sa mga biktima ang prime line sa poste ug nagkutlo sa ilang kinabuhi.
Gidali pa pagdala sa ospital ang duha apan wala na kini maluwas sa mga doktor.
Samtang luwas ra ang laing tulo ka pasahero sa maong hitabo.
