CAGAYAN DE ORO CITY – Na-alarma na si City Mayor Rolando ‘Klarex’ Uy sa sunod-sunod nga kaso sa pagpanglukso sa pipila ka indibidwal diha sa Marcos Bridge nga motugpa sa lawom nga bahin sa Cagayan de Oro river ning syudad.
Kini bisan kon gitahasan na niini si City Police Director Police Col. Aaron Mandia aron mahatagan sa hugot nga seguridad ang mga tawo nga gatabok sa maong tulay sa tuyo nga mapun-an ang dugang hitabo sa pag-ambak.
Gihimo sa mayor ang mensahe nunot sa pabiling pagka-missing sa 15 anyos nga estudyanteng lalaki nga milukso na usab sa tulay kagabii.
Nasuta nga duha sila nga miambak kuyog ang gitoohang higala o uyab niining babaye tungod sa ilang pag-away.
Apan suwerte nga naluwas ang 14 anyos nga babaye sa pipila ka kuwaridor samtang ang batan-ong lalaki ang wala pa gihapon makit-i hangtod ning orasa.
Sa miaging Abril,duha ka batan-on ang namatay gumikan sa pagkalumos kay milukso gihapon sa Marcos Bridge.
