CAGAYAN DE ORO CITY – Gipaubos na sa pagsusi sa mga personahe sa Scene of the Crime Operatives o SOCO 10 ang patay’ng lawas sa mga piloto sa nahagsa nga eroplano sa Philippine Air Force sa bulkang Kalatungan, Brgy Mirayon,Talakag,Bukidnon.
Kini human nakalugsong na ang mga sundalo nga maoy nagdala sa mga lawas nila ni Major Jude Salang-oy nga taga-Cordillera Administrative Region ug 1Lt April John ‘AJ’ Dadulla gikan sa crash site ug gidala sa Saint Peter’s Chapels aron maatiman sa Brgy Lumbia kaganihang kadlawon.
Miingon si Philippine Air Force spokesperson Col. Maria Consuelo Castillo nga wala pa sila’y nahuptan nga resulta sa otopsiya sa maong mga patay’ng lawas aron basehan sa ilang kompirmasyon.
Una nang natultulan sa tropa sa 1st Special Forces Batallion sa Philippine Army ang lokasyon sa nahagsaan sa eroplano ug mga gitoohang piloto.
Hisayrang sila AJ ug Jude ang bugtong wala makabalik sa ilang airbase sa Mactan City,Cebu human pagpatuman sa aerial artillery support sa Philippine Army ground troops nga nakig-engkuwentro sa 70 ka CPP-NPA fighters sa Brgy Iba,Cabanglasan,Bukidnon sa milabay’ng Martes sa kadlawon.
