CAGAYAN DE ORO CITY – Halos dili na maila ang patay’ng lawas sa duha ka piloto ug nagkatag ang parti sa FA-50 fighter jet dihang natultulan sa tropa sa mga sundalo nga natahasan pagpangita pipila ka oras gikan sa pagka-mising ug pagkahagsa niini sa Mount Kalatungan,Brgy Mirayon,Talakag, Bukidnon sa miaging Martes sa kadlawon.
Kini ang gibutyag sa Bombo Radyo ni Philippine Air Force spokesperson Col. Maria Consuelo Castillo subay sa nadawat nila nga impormasyon gikan sa tropa nga naka-rekober sa mga biktima nga sila Major Jude Salang-oy ug 1Lt April John ‘AJ’ Dadulla pagka-buntag sa adlaw’ng Miyerkules.
Miingon si Castillo nga kini ang rason nga wala gilayong gi-diritso pagdala sa Villamor Airbase ang narekober nga mga patay’ng lawas apan gihapit sa Saint Peter Chapels sa Barangay Lumbia aron ipaubos sa forensic analysis nga basehan sa sunod nga ilugwang pahayag sa PAF sa hitabo.
Siya miingon nga napahibalo na nila ang pamilya ni Dadulla nga taga-Brgy Alae,Manolo Fortich,Bukidnon ug Salang-oy gikan sa Cordillera Administrative Region kabahin sa ilang pagkawala gikan sa aerial support mission sa 4ID,Philippine Army nga gika-engkuwentro ang 70 ka CPP-NPA rebels sa Brgy Iba,Cabanglasan,Bukidnon sugod pa sa adlaw’ng Lunes.
Una ang namahayag usab si Castillo sa laing media interview nga gitakdang dad-on sa Villamor airbase ang ilang mga piloto aron hatagan sa funeral honor ug tunulan sa uban pang mga pasidungog tungod sa gidangatan nila may kalabutan sa trabaho.
Dumduman nga una nang gidawat sa pamilya ni Dadulla ang iyang gidangatan taliwala nga nakurat ug gisakitan sila pag-ayo sa resulta sa panghitabo.
Miingon si Jevenel Dadulla,magulang ni AJ nga sakit man nga nawala kanila ang ilang igsoon apan garbo usab nila nga nakahatag sa legasiya sa iyang trabaho isip tigpanalipod sa seguridad sa katawhan sa nasud.
Si AJ ang gitakda nang kaslon sa iyang fiancé nga si Abigail sa Marso 15 apan mahulipan kini sa mga pagsubo’g pagbakho kay himoon ang paglubong kaniya sa pribadong menteryo sa Brgy Mambatangan,Manolo Fortich,Bukidnon.
Hisayrang si AJ ang licensed electronic engineer apan tungod kay daghan pa’g kagustuhan sa kinabuhi alang sa iyang pamilya,rason nga nangahas pagsulod sa military service ug nahatagan sa higayon maka-alagad sulod sa PAF.
