CAGAYAN DE ORO CITY – Walay bisan usa nga sakop nila nga organic member sa kapolisan ug bisan non-uniform personnel nga mihawa sa katungdanan sulod sa PNP kay dismayado sa kasamtangang panghitabo sa nasud.
Kini ang subli pagpaklaro ni Police Regional Office 10 spokesperson Major Joann Navarro nunot sa nabaniug nga adunay pipila ka pulis gikan sa ubang mga lugar nga nanghawa kay wala na makaangay sa gipangbuhat sa PNP officials ngadto kang kanhi Pres Rodrigo Duterte.
Una nang nag-viral ang pipila ka social media post nga adunay nanghawa sa trabaho nga mga pulis kay gikaulaw na ang ilang pagsilbing PNP member kay dayag ang kasupakan sa balaod samtang gidakop si Duterte aron itugyan sa International Criminal Court didto sa The Hague,Netherlands.
Siya miingon nga managlahi man ang ilang prinsipyo’g baruganan kabahin sa mga init nga isyu apan wala nila pasagdi ang ilang trabaho.
Kini tungod kay nag-unang tahas nila kuyog ang ubang law enforcement agencies ang paghatag seguridad sa katawhan.
