CAGAYAN DE ORO CITY – Walay atubangon nga obligasyong kriminal ang drayber ingon man ang mismong tag-iya sa trak de karga nga hinungdan sa kamatayon sa duha ka menor de edad ug laing usa ang kritikal ang kahimtang sa Sitio Langag,Brgy Dansolihon ning syudad.
Kini ang katin-awan ni Capt Emilita Simon,assistant spokesperson sa Cagayan de Oro City Police Office o COCPO subay usab sa gihatag nga pasiunang resulta sa imbestigasyon sa Lumbia Police Station kabahin sa hitabo.
Siya miingon nga natultulan sa Lumbia Police Station ang hingtungdan sa trak diin gilayong mihangyo sa tagtungod sa mga namatay’ng biktima ug sa angol aron mosulod sa kasabutan.
Namahayag si Simon nga nagkauyon na ang duha ka panig diin gitubag sa tag-iya sa trak ang obligasyon sa pagpahiluna sa mga namatay’ng biktima ug sa mga galastuhan sa panghitabo.
Dumduman nga maoy namatay ang 15 anyos nga nag-nameho sa motorsiklo nga si John Lloyd Saria ug Kyle Caberos,13 anyos ug giatiman pa usab ang angol nga si Clint Dave Villarasa nga pulos nagpuyo sa nahisgutang lugar.
Hisayrang atol sa hitabo,napasok ilawom sa nakaparadang sakyanan ang mga biktima diin gilayong namatay ang duruha dihang narespondehan sa mga otoridad sa miaging Domingo sa kadlawon.
