CAGAYAN DE ORO CITY – Dili makahimo’g pagdakop ang mga pulis kung gamiton ang elemento sa ‘warrantless arrest’ ngadto sa grupo ni interim General Manager Fermin Jarales.
Kini ang subling paghatag katin-awan sa Cagayan de Oro City Police Office o COCPO kabahin sa daw dili makiangayon nga paghulagway sa mga sakop sa Cogon Police Station ubos sa liderato ni Major Sabino Labitad nga wala mo-aksyon sa gipamugos sa regular management nga grupo ni Jarales ang miguba sa pultahan sa opisina aron makasulod sa bisinidad sa COWD niadtong Abril 16 sa buntag.
Sa gilugwa nga pahayag sa COCPO, hangtod nga wala maaktuhi sa mga pulis ang maong hitabo o walay direktang kaalam sa tinud-anay nga pasangil,dili usab sila makabasta-basta’g dakop.
Dugang sa COCPO post sa social media nga patas ang gihimong pagtratar nila ni City Director Col. Salvador Radam ug Sabino sa duha ka magkabanging panig sa tuyo nga kalikayan ang pag-grabe sa tensyon.
Gani, napakalma ni Radam ang kampo ni Jerales ug acting COWD General Manager Engr Edna Najeal nga mapaubos sa COCPO ang kustodiya sa mga gikaintapang mga papeles nga nakagawas sa opisina kay gipasalig man niini nga adunay himoon nga imbentaryo.
Kini ang hinungdang nga subli gipalanog sa COCPO ang katin-awan nga wala nagpasagad ang ilang kapolisan sa hitabo sukwahi sa mikatag sa social media.
Dumduman nga nabatbat usab ni Radam nga kung magka-kinasuha ang duha ka panig, angayang iagi na nila kini sa regular filing sa piskalya.
Sa pikas bahin,wala usab kapugngi ni regular COWD board of director chairman Dr. Gerry Caño ang pagpalanog sa ilang pagka-dismaya sa COCPO rason nga nanganti sila nga apilon kini’g kaso didto sa Ombudsman.
Nagsumikad ang komosyon sulod sa COWD kay gimanduan kanhi Regional Trial Court Branch 41 Judge Joeffre Acebido ang Local Water Utilities Administration o LWUA diin tinudlo si Jarales magdumala sa COWD nga mohunong na sa ilang mga gimbuhaton.
Daan nang misulti ang lead counsel nila ni Najeal nga si Atty. Greg Pallugna nga makahimo pa’g apelasyon ang kampo ni Jarales sa hukom sa korte sanglit dili pa kini pinal apan mahimo pa idangop sa Court of Appeals o CA kung gikinahanglan.
Nabantayan usab sa COCPO nga nagtinulura ang panig ni Jarales ug Najeal kabahin sa nahitabo sa COWD diin nagsumikad ang komosyon.
