CAGAYAN DE ORO CITY – Gitumbok sa Police Regional Office 10 nga kabahin ang naka-absent without official leave o AWOL nga pulis nga gikasuha’g criminal sa kamatayon sa police official sa Brgy Bulua ning syudad sa miaging Oktobre 5, 2024.
Kini human pusila si Cogon Police Station commander Capt Abdulcahar Armama diin naigo ang iyang ulo dihang pasulod na unta sa balay sa iyang ugangan sa maong brgy.
Miingon si PRO 10 Director Brig Gen Jaysen De Guzman nga maoy gikasuhan pinaagi sa case build up sa Cagayan de Oro City Police Office si Police Staff Sgt Armand Tagolimot alyas ArTags gumikan sa nahitabo kang Armama.
Namahayag si De Guzman nga kini ang rason nga nadugay ang pagtug-an sa kapolisan kung kinsa ang kabahin sa gisumbong kay dako ang trabaho sa CBU kuyog ang government prosecutors.
Gihinaut usab niini nga adunay makakuha nga ebedensiya kabahin sa nabawi nga armas gikan kang ArTags nga hayan gigamit pagpusil kang Armama.
Sa pagkasikop ni ArTags,kusganong gihimakak niini nga nalambigit kini sa gidangatan kang Armama.
