CAGAYAN DE ORO CITY – Mag-atubang sa daghang kasong criminal ang duha ka impostor nga sibilyan nagpatoo nga mga sakop sa Philippine National Police o PNP.
Kini human nasignit sila alyas Nash,33 anyos,sekyu nga taga-Poblacion,Marantao,Lanao del Sur ug alyas Uno,45 anyos nga nagsumikad sa Caingin,Maloslos,Bulacan.
Matud ni Police Regional Office 10 spokesperson Joann Navarro nga maoy nakadakop sa duruha ang tropa sa Iligan City Police Station 4 nga nakasakay sa kolor puti nga van.
Nabawian ang duruha sa kalibre 45 nga armas ug uniporme sa pagka-pulis kay nagpailang miembro sa PNP si Nash.
Gawas sa armas ug uniporme nga nabawigikan sa mga dinakpan,gikompiskar usab ang ilang gimaneho nga sakyanan.
Tungod niini,gidayeg ni PRO 10 Director Brig Gen Jaysen De Guzman ang kalampusan nga nahimo sa Iligan City Police Office kay napugngan na usab ang laing potensyal nga pagpanghasi sa mga suspek.
Kasong kasupakan sa Comprehensive Firearms and Ammunition Regulation Act in relation to the COMELEC Gun Ban ug pagsupak sa Usurpation of Authority or Official Functions under Article 177 of the Revised Penal Code ang pang-atubangon sa duruha.
