CAGAYAN DE ORO CITY – Nadakpan sa hiniusang operasyon ug pagpatuman sa arrest warrant sa kapolisan ingon man militar ang giingong kanhi miembro sa Maute-Dalwah Islamiyah nga wanted person nga dunay daghang akusasyong giatubang sa korte sa Lanao del Norte.
Namahayag si Police Regional Office 10 spokesperson Joann Navarro nga maoy gisilbihan sa mandamiento aresto sa ilang lower units operatives ang akusado nga si alyas Ikrima,24 anyos nga taga-Brgy Ramain,Munai sa maong probinsya tungod sa kasong direct assault with attempted murder.
Siya miingon nga may kalabutan kini sa ‘straffing incident’ nga kabahin si Ikrima sa mihimo punting sa mga pulis sa Maigo Municipal Police Station nga mihimo’g operasyon sa usa ka kan-an diin adunay nasamdam niadtong Disyembre 2023.
Nasuta usab nga suspek gihapon kini sa kamatayon sa upat ka sundalo ug siyam samaron nga pulos ubos sa 44th IB,Philippine Army kay natigayon ang engkuwentro niadtong Pebrero 2024.
Gitudlo usab kini nga apil sa pag-ambush-patay sa duha ka army intelligence operatives sa 51st IB sa lungsod sa Munai ug pagbomba sa tore sa NGCP sa Brgy Paiton,Kauswagan.
Dugtong niini,nalipay pag-ayo si PRO 10 Director Brig Gen Jaysen De Guzman nga nasignit sa katapusan ang akusado nunot sa hiniusang operasyon sa 1st Provincial Mobile Force Company ubos sa Lanao del Norte Police Provincial Office, Munai Municipal Police Station ug Regional Intelligence Unit 10 ning semanaha lamang.
