CAGAYAN DE ORO CITY – Mihangyo ang 4ID,Philippine Army sa publiko nga i-uban sa ilang mga pag-ampo ang upat sa ilang mga sundalo nga ubos sa 28th IB nga makalinggawas sa peligrong kahimtang epekto sa mga pagkaangol niini dihang gilusob nila ang pipila ka sakop sa Communist Terrorist Group sa lungsod sa Impasug-ong,Bukidnon.
Kini human respondihi sa maong tropa ang gisumbong sa mga sibilyan nga pagpangilkil sa CTG members sa bukirang bahin sa Brgy Hagpa diin nag-resulta sa pila ka minutos nga engkuwentro.
Miingon si 4ID spokesperson Major Joe Patrick Martinez nga mas gikinahanglan sa ilang mga sundalo ang mga pangaliya sa katawhan taliwala sa gipakitang kaisog ug sakripisyo niini batok sa mga kaaway diin sila nahiagom sa mga igo sa maong hitabo kagahapong adlawa.
Siya miingon nga wala igsapayan sa ilang mga sundalo nga nahiagom sa mga igo kay maoy bililhon kanila ang paghatag sa kagawasan sa katawhan batok sa padayong pagsabwag sa kagubot sa mga kaaway sa estado.
Sa pagkakaron,anaa na sa Evangelista Station Hospital sulod sa Camp Evangelista ang maong mga sundalo ug gisagubang ang resulta sa ilang sakripisyo tungod ug alang sa ikalinaw sa katawhan sa Impasug-ong.
Dugtong niini,gibutyag ni 4ID commanding general Major General Michele Anayron Jr nga giila sa Armadong Kusog sa Nasud ang kaisog ug sakripisyo sa ilang mga sundalo diin wala igsapayan ang peligro maproteksyon lang sa kreminalidad nga gipakatap sa nabiling CTG members.
Siya miingon nga kuhaon nila ang nabiling mga kontra sa estado sanglit wala na’y guerilla front sa CTG nga naglihok sa Bukidnon ug ubang bahin sa Mindanao diin operational area sa 4ID.
