CAGAYAN DE ORO CITY – Nanganti si City Mayor Rolando ‘Klarex’ Uy nga wala na’y iyang tugtan nga mga padrino ug padrina sa pagpasulod sa bag-ong mga empleyado sa city hall.
Gihimo sa mayor ang pasidaan nunot sa iyang kusganong mensahe nga wala na siya’y e-renew nga casuals ug job orders paghupas sa Hunyo 30 nila nga panarbaho sa city govt.
Namahayag si Uy nga ensakto na ang tulo ka tuig nga nahatag niini sa maong mga trabahante ug angay nga siya na usab ang masunod sa kagustuhan niini ipatuman sa administrasyon.
Dismayado usab ang mayor nga tinud-anay gitabangan ang maong mga trabahante apan wala sila sa panahon nga gikinahanglan usab ang ilang suporta.
Hinoon, wala tumbuka sa mayor ang kahulugan sa iyang mga gisulti apan nagtoo ang uban nga may kalabutan kini sa bag-uhay nga eleksyon diin siya nahatagan sa ikaduhang termino magsilbi sa katawhan sa dakbayan.
