CAGAYAN DE ORO CITY – Hayan adunay makasuha’g kriminal kung walay makab-ot nga kasabutan ang panig sa Donsal mini-bus ug elf- truck nga hinungdan sa kamatayon sa pahenante ug pagka-angol sa 17 ka pasahero sa pagpanagbangga niini sa Purok 13,Sitio Baloy,Brgy Tablon ning syudad.
Giila ni Police Staff Sgt Maximo Judaya,imbestigador sa Traffic Enforcement Unit sa Cagayan de Oro City Police Office ang namatay’ng biktima nga si Reggie Villarobia nga taga-Libona,Bukidnon nga maoy nagrabehan sa aksidente.
Siya miingon nga subay sa inisyal nga sulti sa bus driver nga si Retchel Montecer nga taga-Valencia City,Bukidnon nga layo pa lang,nabantayan na niini ang kusog nga dagann sa truck hinungdan sa dugu-ong hitabo.
Gisaysay usab sa truck driver nga si Alexis Navarro nga kalit nawad-an sa preno ang gimaneho niya nga salakyan rason nga wala na kini control ug misungag sa bus.
Hinoon,dili ra grabe ang mga kahimtang sa ubang mga pasahero apan posibleng adunay mag-atubang sa kaso tali sa duha ka drayber kung walay makab-ot nga kasabutan ning adlawa.
