CAGAYAN DE ORO CITY – Nakabawi ang Police Regional Office 10 pinaagi sa ilang lower units sa sobra 16 milyones pesos nga shabu ug marijuana sa nalusad nila nga 229 ka operasyon sa Northern Mindanao sa milabay’ng Mayo ning tuiga.
Namahayag ang PRO 10 pinaagi kang Brig Gen Jaysen De Guzman nga regional director sa Kampo Alagar nga particular nga nakuhaan nila sa 2,363.852 grams sa shabu, 34.2 grams sa pina-uga nga mga dahon sa marijuana ug unom ka tanom niini ang tipik sa 282 ka dinakpan gikan sa nagkadaiyang bahin sa rehiyon.
Gawas sa droga, nagpahigayon usab ang lower units sa anti-illegal gambling operasyons diin 55 ka sugarol ang nadakpan ug nabawian sa sobra 29-mil pesos nga kagamitan sa pasugal.
Nadakpan na usab sa kapolisan ang 315 ka tawo nga naglakip sa 96 ka pinaka-pinangita sa balaod.
Naka-kustodiya usab kanila ang 75 ka klase-klaseng pusil nga walay igong mga papilis.
Giapil usab sa mga otoridad ang paglutos sa mga tawong nalambigit sa ilegal mining operasyon diin kapin 2 milyones pesos ang nangabawi nga kagamitan gikan sa kabukiran diin anaa ang pagkalot-kalot sa bulawan.
