CAGAYAN DE ORO CITY – Gipanganti ni acting Police Regional Office 10 Director Brig Gen Rolindo Suguilon nga walay hunong ang kampanya sa gobierno batok sa mga indibidwal nga nalambigit sa online sexual abuse ug children exploitation sa Northern Mindanao.
Gihimo ni Suguilon ang pahayag dungan sa pagtimbaya sa ilang lower units sa ilang kalampusan pagdakop sa 35 anyos nga babaye nga nalambigit sa kasupakan sa Anti-Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) Act sa Purok 6,Brgy Tambacan,lligan City.
Gibasehan sa heneral ang pagka-rescue sa tulo ka batan-on nga gilangkuban sa duha lalaki ug usa ka babaye nga gigamit sa maong suspek sa illegal nga kalihukang-seksuwal.
Napasayon ang pagpatuman sa entrapment,rescue operation ug pagpahamtang sa Warrant to Search, Seize, and Examine Computer Data (WSSECD) batok suspek tungod sa hiniusang paglusob sa Iligan City Police Office Task Force OSAEC,ICPS 4, Regional Anti-Cybercrime Unit 10 – Lanao del Norte Provincial Cyber Response Team ug City Social Welfare and Development Iligan City.
Tungod niini,kasuhan ang suspek sa pagsupak sa Anti-Online Sexual Abuse or Exploitation of Children ug Anti-Child Sexual Abuse or Exploitation Materials Act sa piskalya sa Iligan City sunod semana.
Kasamtangang gipaubos sa kustodiya sa CSWD ang mga biktima samtang ang dinakpan detinado sa mini-cell sa ICPO alang sa pag-inquest kaniya sa piskalya sa adlaw’ng Lunes.
