CAGAYAN DE ORO CITY – Gipanganti ni Bugo Punong Brgy Spencer Cailing nga manubag sa hukmanan ang suspek nga mipatay sa ama-ama niini sulod sa kaugalingong pinuy-anan sa Zone 5,Lower Kalye Apike sa ilang lugar ning syudad.
Gitumbok ni Cailing ang miikyas nga suspek nga si Rommel Belnas alyas Willson Ledesma,minyo ug nagpuyo sa lugar.
Matud sa opisyal nga dili sila mohunong pagtabang sa pamilya aron mahatagan sa dinalian nga kaangayan ang kamatayon sa biktima nga 73 anyos nga si Juanito Ledesma nga molopyo sa brgy.
Siya miingon nga gawas sa pasiunang mga pagtunol sa tabang sa batakang panginahanglan sa pagpahimutang sa biktima,nauyunan usab sa konseho ang tinguha nga makuha sa dali nga panahon ang suspek aron mataral sa husgado.
Dumduman nga paspas mikagiw palayo sa crime scene dihang iyang nahunusan sa kinabuhi si Ledesma kinsa kapikas sa 70 anyos nga si Elizabeth Ledesma sa miaging semana.
Hisayrang si Lola Elizabeth unta ang gisulaya’g dunggab ni Belnas apan kay karatista kini,nasipaan niya ug ang kapikas na hinoon niini nga si Lolo Juanito ang napahimuntang.
