CAGAYAN DE ORO CITY – Nasignit sa tropa sa City Drug Enforcement Unit sa Cagayan de Oro City Police Office kuyog ang mga operatiba sa Philippine Drug Enforcement Agency 10 ang suspected high value individual ug apil ang tulo ka kauban sa buy-bust operation sa hotel sa Corrales Avenue,Brgy 29 ning syudad.
Matud ni COCPO deputy spokesperson Capt. Emilita Simon nga maoy target sa operasyon si alyas Ben,45 anyos nga taga-Iponan ingon man sila Fely,44 anyos,taga-Balongis,Balulang; Pep,50 anyos,gikan Bulua ug Paul,60 anyos nga nagsumikad sa lungsod sa Aloran,Misamis Occidental.
Nabawian sa joint operating troops ang mga dinakpan sulod sa kuwarto sa hotel sa 290 gramos nga gitoohang shabu nga adunay halos 2 milyones pesos nga kantidad.
Gipangbitbit sa COCPO-CDEU ang mga dinakpan alang sa ensaktong disposisyon ug gitakdang kasuhan sa pagsupak sa Comprehensive Dangerous Drugs Act of 2002.
